ÅRSMELDING for HAUGESUND JOURNALISTLAG 2004/2005

 

Årsmøtet blei halde 27. oktober i Hotell Rica Maritim i Haugesund

Årsmøtet valde dette styret:

Styret i Haugesund Journalistlag 2005/2006

Årsmøtet valde som HJ- leiar, Thomas Førde, for eitt år. Rosa Villalobos og Harald Nordbakken blei begge valde for to år. Nils-Tore Sele blei vald for eitt år. Eli Osland var ikkje på val.

Som 1. varamann blei Bjarte Amble valt for eitt år og Jane Junger for eitt år som andre varamann.

Til revisorar valde årsmøtet Kristine Sele og Arne Frøkedal. Valkomiteen fekk denne samansetjinga: Harald Dale, Truls Horvei og Siri Handeland.

 

Årsmøtet 2005 vedtok denne handlingsplanen for Haugesund Journalistlag 2005/2006:

Seminar/debattmøte/opne møte: 

Vinterkonferansen (Stord-konferansen) siste helga i januar

Debattkveld i april

Sommarfest i juni

Deltaking i Hauststormen i Bergen, (dersom denne blir skipa til) i september

Årsmøte/debattmøte oktober/november

 

Tillitsråd skal haldast to gonger

1.      seinhaustes/vinter    2.      vår/sommar. Minst eitt av desse bør haldast på dagtid.

Under tillitsråd er det møteplikt for minst ein representant frå kvar redaksjonsklubb

Fagleg arbeid:

-Verva fleire medlemmer

-Styrka den faglege stoda i klubbar og bedrifter.

-Yta særskilt hjelp til fagleg utvikling i små redaksjonar.

-Stimulera til fagleg debatt i klubbane og mellom lagets medlemmer.

-Stimulera trivsel samtidig som laget bidrar til utvikling av sosialt og fagleg nettverk mellom redaksjonane.

 

Styrets arbeid:

Styret har hatt 11 styremøte.

Styrearbeidet i det nye arbeidsåret blei opna med heildags styreseminar i Skånevik. Det meste av arbeidstida under seminaret blei nytta til førebuing av Stord-konferansen i slutten av januar 2006.  Styreseminar er ein særs nyttig og effektiv start på arbeidsåret.

 

Andre oppgaver for styret:

Styreleiar i HJ har representert lokallaget under to møte i landsråd i NJ i året som gjekk. Styreleiar deltok også under NJ si jubileumsmarkering i Oslo i vår.

Mykje tid og krefter gjekk med i vårhalvåret til førebuing av tariffoppgjeret og ein mogeleg konflikt. Styreleier og nestleiar deltok i kvar sin tariffkonferanse.

Førebuinga av Hauststormen starta alt i januar. Styreleirar har vore medlem av styret i Hauststormen, medan Svein Olav Langåker, klubbleiar i Sunnhordland var med i programkomiteen til Hauststormen.

 

Tillitsråd

Første tillitsråd blei halde under Stord-konferansen siste helga i januar 2006. Sjølvaste NJ-leiar Ann-Margrit Austenå gjesta oss under tillitsråd lørdag 28. januar. Ketil Heyerdahl frå NJ-sekreteriatetet var også med.

Det andre tillitsrådet blei halde torsdag 4. mai i forkant av debattmøtet same kveld. Tema for tillitstråd var førebuing til tariffoppgjer og til ein mogeleg konflikt.

 

Medlemstalet aukar

Fallet i medlemstal, som vart påpeika under førre årsmøtet, er nå snudd til auke. Medlemstalet er nå 98 mot 87 for eitt år sidan, ein auke på 12,6 prosent. I tillegg har NJ’s Frilansklubb fire registrerte medlemmer i vårt distrikt.

Styret har teke tak i situasjonen siste året. Ein medlemsvervebrosjyre for HJ er laga og blir distribuert til potensielle medlemmer saman med NJ sitt vervemateriell. I haust har HJ saman med Frilansklubben sin lokal-kontakt sett  i gang ein vervekampanje. Brev er sendt til alle klubbleiarar og til redaksjonar der me ikkje har medlemmer. Me ønskjer å få inn namn på alle som arbeider som journalist/frilansar i vårt distrikt. Alle  desse skal deretter bli kontakta med tilsendt vervemateriell og seninare med tilbod om medlemskap.

  Me har framleis eit visst vervepotensiale  både til HJ og til Frilansklubben.

Eit opplagt og realistisk mål ligg føre oss. HJ bør i komande arbeidsår passera eit medlemstal på 100. Me har aldri vore så mange.

 

 

Her er oversyn over kor mange medlemmer me har i dei ulike redaksjonane:

Bergens Tidende: 2

Bømlonytt: 3

Grannar: 4

Grenda: 2

Hardanger Folkeblad: 6

Haugesunds Avis: 41

Kvinnheringen: 4

NRK Horaland: 1

NRK Rogaland: 3

Pensjonistar:6

Radio 102: 3

Radio Haugaland: 1

Ryfylke: 1

Stavanger Aftenblad: 1

Suldalsposten: 1

Sunnhordland: 12

TV Haugaland: 6

Vestavind: 1

 

 

Stord-konferansen 27-29.januar

Dette er flaggskipet vårt både når det  gjeld programtilbod, arbeidsinnsats frå styret og oppslutnad frå medlemmer. Stord-konferansen er bygt ut til å omfatta ei heil helg frå fredag ettermiddag til lunsj søndag.

1. Småbrukarlaget: Dette er ei samling for HJ-medlemmer i små og mellomstore redaksjonar. I år gjesta både NJ-leiar Ann-Margrit Austenå og Ketil Heyerdahl, fagleg sekretær i NJ, denne samlinga. Opnings-innleiinga  var ved Trond Olav Skrunes. Som redaktør i den vesle bydelsavisa Sydvesten i Fyllingsdalen i Bergen, blei Skrunes i 2005 tildelt SKUP-diplom . Skrunes fortalde levande om korleis han arbeidde med reportasjane som gav SKUP-diplom. Under dette arbeidet var han mange dagar aleine på jobb i den vesle redaksjonen.

2. Tillitsråd blei halde lørdag føremiddag på Stord. Samtidig hadde HJ tilbod om (3). kurs i nettjournaliststikk, som blei særs vellukka. Dugande kursleiar var Knut Erik Hareide frå TV2 Nettavisen.

4. Hovudseminaret starta etter lunsj lørdag med journalist Hallgeir Opedal frå Dagbladet , som fortalde med mykje humor og stor innleving om seg sjølv og om korleis han arbeider når han skal laga gode portrettintervju.

 Etter dette innslaget laga Odd Kåre Grøttland i Haugesunds Avis ei nyttig oppsummering, ei slags kokebok om skriving av gode portrett. Denne oppskrifta ligg framleis tilgjengeleg på HJ’s nettsider.

 Alle aviser satsar på magasin.  Er dette ei nyorientering og samtidig ei ufarleggjering av den tradisjonelle avisjournalistikken? Magasin-redaktør i Dagbladet innleiide  til debatt og snakka om Dagbladets satsing på magasin-fronten.

Kva er avslørt i saka rundt Aksel Kloster sine økonomiske disposisjonar. Arne Frøkedal frå Haugesunds Avis innleidde til debatt. Lesarombod i Bergens Tidende, Terje Angelshaug var opponent.

Lesarombud i Bergens Tidende, Terje Angelshaug, fortalde søndag om  korleis denne eineståande stillinga i norsk presse fungerer, i visse høve talar han lesarane si sak og redaksjonsleiinga midt imot.

 

5. Under Stordkonferansen held HJ prisdryss. Den utovervende presseprisen gjekk til avtroppande Sildajazz-general Gunnar Jæger.

HJ’s journalistpris vart delt ut for første gong. Prisen gjekk til Silje Andvik Hoaas frå Hardanger Folkeblad. Ho vann dessutan andrepremien i foto-konkurransen. Foto-konkurransen blei vunnen av Harald Nordbakken frå Haugesunds Avis.

 

 

Debattmøte 1

 Debattmøte blei halde straks etter årsmøtet:

Vil auka satsing på nettaviser ta livet av journalistjobbar i papiravisene?

Dette var overskrifta for debattmøtet like etter årsmøtet. Innleiarar var: Redaktør i bladet Kampanje, Hans Hjellemo, Lars Mæland, som er redaktør i bladet Sunnhordland, nettredaktør Kjell Skrunes i Stavanger Aftenblad og dagleg leir i Landslaget for Lokalaviser, Rune Hetland.

Papiravisene vil leva godt i mange år framover, men nettavisene blir stadig viktigare. I dag er mange papiraviser sine nettaviser oppsiktsvekkande dårlege. Dette var nokre av konklusjonane etter debattmøte

  Kvelden blei avslutta med tapas-middag på hotellet.

 

Debattmøte2

Tekstreklame var hovudtema under debattmøte 4. mai i Rica Maritim Hotell i Haugesund

Problemstillingar til debatt: -Er journalistikken i bilag og temasider regissert berre som innsats i pengemaskinar? -Trør journalisten her over presse-etiske grenser mellom tekstreklame og redaksjonelle uavhengigheit -Etter mange år med presse-etiske øvingar og jakt på overtramp i høve til tekstreklame; er me blitt flinkare?

Forskar Ivar Andenæs fra IJ-senteret heldt innleiing

Han har laga ei undersøkjing om pressetikk og tekstreklame i bilag og temanummer i nord-norske lokalaviser. Han presenterte sine funn

Andenæs fekk også tilsendt til gjennomsyn, utvalde bilag og temanummer frå lokalaviser i vårt distrikt. Han fann fleire overtramp.

 

 

HAUSTSTORMEN 29. september til 1. oktober på Voss

150 deltakarar og dermed den største Hauststormen hittil. Det faglege programmet blei særs vellukka. 14 deltakarar frå HJ’s distrikt. Nytt i år var mellom anna at også Møre og Romsdal Journalistlag var med på arrangør- og deltakarsida. Det same var Redaktørforeningen vestafjells. Nytt av året var også matnyttige journalistkurs i regi av IJ på fredag før sjølve Hauststormen.

Frå HJ har styreleiar vore medlem av Hauststormen styret, medan Svein Olav Langåker frå Sunnhordland var med i programkomiteen. Meir om innhald i programmet for Hauststormen kan lesast : www.hauststormen.com.

 

Tariffoppgjer og streik i 2006

 

Det var knytt stor spenning til årets hovudoppgjer både i MBL-området og i NRK. I MBL-området enda forhandlingane i dei to siste hovudoppgjera med streik. Til liks med tariffoppgjeret for to år sidan stod pensjonspørmålet sentralt saman med opphavsretten. I NRK-oppgjeret var hovudkrava lønn og meir fritid/ferie.

 

HJ-styret brykte mykje tid og krefter på at laget skulle vera godt førebudd i tilfelle konflikt. Førebuingane var langt framskridne då tariffforhandlingane braut saman  og NJ og MBL måtte til meklingsmannen. Same vegen gjekk det med NRK-oppgjeret.

HJ hadde lokale og utstyr på hand, streikeorganisasjonen var klar.

Men utpå natta, tre timar på overtid, natt til lørdag 3. juni blei det meklingsløysing med desse resultata i MBL-oppgjeret:

Pensjonsløysinga i kortform
• Målformuleringa om at ei god pensjonsordning bør gi rundt 2/3 av sluttlønn
• Reelle forhandlingar
• Konsekvensutgreiingar
• Partssamansett utval
• 15 månaders skriftleg oppseiingsfrist  av pensjonsordninga
• Golv: 4/7 innan 31.3 2010
• Uføredekning innan 31.3.201

Økonomi i kortform
• Generelt tillegg for alle på 1950 kroner
• Minstelønnssatsane er auka i tillegg
  Talla under kjem i tillegg til 1950 kroner
    -Etter 12, 14, 16 og 18 år: + 1000 kroner
    -Etter 20 år: +3000 kroner
    -Etter 25 år: +4000 kroner
    -Etter 30 år: +5000 kroner

NRK-oppgjeret enda derimot til streik. Fire av våre medlemmer blei tatt ut i NRK-streiken, som varte i åtte dagar fram til onsdag 7. juni. Mellom hovudresultata etter streiken var:  Alle får 14.000 kroner i generelt tillegg, og 17.100 kroner i gjennomsnitt. Angrepet på avtaleverket er slått tilbake. Og NRK opnar for éin ekstra fridag neste år.

 

SOMMARFESTEN fredag 9. juni

Etter at alle streikeførebuingar, streikegjennomføringar og forhandlingsresultat var oppnådde inviterte HJ til Sommarfest i Høvleriets toppetasje i Strandgata i Haugesund. Ein særs vellukka kveld, som enda fleire ville hatt stor glede av å delta i.

 

 

 

UTFORDRINGAR:

Det siste året har vore perga av store og dramatiske endringar  på eigarsida i mange av mediebedriftene våre. Orkla Media blei selt til den utanlandske eigaren, Mecom, som nå har kalla mediaeigarselskapet sitt Edda. Dei største regionavisene saman med Aftenposten søkjer nå saman til giganten Media Norge.

Det rår stor uvisse kring framtida for arbeidsplassane våre  når konsentrasjonen på eigarsida er sterkt aukande samtidig som apetitten på større avkasting hos kapitaleigarane er utan grenser.

Ei av våre fremste utfordringar i denne situasjonen er å byggja organisasjonen sterk og slagkraftig både når det gjeld medlemstal og handlekraft. For lokallaget er det dertil ei viktig oppgåve å laga til møteplassar der journalistar  frå små og store media, frå uavhengige redaksjonar og frå konserneigde redaksjonar kan koma saman til fagleg debatt, sosialt samvær og til prosessar, som fører til aukande fagleg medvit i journalistrolla.

 Dessutan bør det framleis vera  ei viktig oppgave for lokallaget å støtta, stimulera og hjelpa fram det faglege arbeidet, særskilt  i mindre redaksjonar.  Men lokallaget arbeider med små ressursar. Det aller meste av arbeidet i lokallagsstyret må skje på fritid og på dugnad. Me må velja våre slag og elles søkja hjelp og støtte frå NJ så ofte råd er.

 

Haugesund 25. oktober 2006

 

Styret i Haugesund Journalistlag