Den nye redaktøren i Fjordabladet er fødd i 1951 i Øystese i Hardanger, og trakka sine barnesko i Valle i Setesdal. Som 15-åring mønstra han på som messegut, og avslutta karrieren til sjøs som stuert ni år seinare. Deretter byrja han i verftsindustrien, først to år ved Kristiansand Mekaniske verkstad, deretter ved Ankerløkken i Førde, der han var klubbformann til verftet gjekk konkurs i 1986. Flatebø starta deretter opp Førde Maritime Industri, eit selskap med 140 mann i arbeid, og som leigde verftet. Der var han leiar i to år før det vart selt.

  I 1988 byrja Flatebø i avisbransjen, først som disponent i avisa Klassekampen. Deretter flytta han tilbake til Førde og var med på å dra i gang den fylkesdekkjande gratisavisa Sentrum. Journalistutdanninga si tok han ved merkantilt institutt i Bergen og Stavanger Flatebø flytta så til Nordfjord der han var trenar for Eid sitt herrelag, og jobba samstundes som frilansjournalist før han vart tilsett som journalist i Fjordabladet sommaren 2002. Det siste året har Flatebø fungert som redaksjonssjef i avisa.

  Den nye redaktøren i Fjordabladet er gift og har to barn og to barnebarn. Han bur på Eid, men pendlar ofte mellom Eid og Venøy i Selje, der familien har hus. Flatebø har ikkje tenkt å snu opp ned på lokalavisa no med ein gong, men signaliserer at han vil gjennomføre mindre endringar i samråd med dei andre på huset.

Tekst: Anna Wuttudal