Juryen for presseprisen 2005 har bestått av journalist og programleiar i TV2, Solveig Barstad, informasjonsleiar i Fiskebåtredernes
forbund, Arill Riise, tillegg til informasjonssjef i Helse Førde, Arild Nybø, som var leiar for juryen.
Nybø ba dei andre jurymedlemene vurdere habiliteten hans i forhold til at eitt av bidraga handla om ein av institusjonane
i Helse Førde, og det faktum at han tek til i avisa Firda ved årsskiftet, og har fartstid i NRK som også hadde levert bidrag.
Jurymedlemene Barstad og Riise fann i dette høvet ikkje vanskar med habiliteten til Nybø, ikkje minst så lenge juryen var
samrøystes slik den vart i dette tilfellet.
Prisvinnaren Katrine Sele frå utdelinga på Frønningen. |
Juryen uttalar følgjande om presseprisvinnaren 2005: |
Journalisten får prisen for ein lengre artikkel som er nyskapande, nærast poetisk i forma, om psykisk sjukdom og tabuemnet
sjølvmord. Den handlar om Ole Johan Grønskag, ein ung dramatikar frå Kalvåg som tok sitt eige liv i mai 2004. Prisvinnaren
hadde fulgt opp Grønskag i eit par år i samband med to av teaterstykka hans. Etter han døydde kom ho i kontakt med veslebroren
Aleksander som hadde svært mykje klokt å seie både om det presset familien hadde levd under, om kor mykje Ole Johan hadde
betydd for han, og om korleis han likevel hadde greidd å forsone seg med broren sin død.
Journalist Katrine Sele fortel sjølv at ho strevde svært med å skrive artikkelen, især fordi sjølvmord er eit veldig betent
tema. Artikkelen fekk god respons, og vart trykt på nytt veka etter i Firdaposten.
Sele si sak får fram ein røyndom som vi alle har nytte av å få vite om. Ho seier det var viktig å skildre forsoninga, men
håpa samtidig at ho fekk fram noko av den grenselause sorga som familien har måtta lide. Juryen meiner at Sele meistrar denne
balansegangen til fulle.
Gjennom veslebroren Aleksander fører Katrine Sele lesaren så nær tragedien at vi alle må reflektere over livet. Artikkelen
er dessutan godt oppbygd dramaturgisk, noko som gjer at lesaren ikkje kan unngå å lese alt frå A til Å, og på den måten får
med seg heile historia.
Juryen håpar at ein pris til Katrine Sele også er ei oppmuntring til andre journalistar om å ta tak i vanskelege emne utan
å ta snarvegar eller grep som skal sjokkere. Ein pris til Katrine Sele er ein heider til ein stor forteljar. Ein samrøystes
jury gjev derfor Presseprisen 2005 til journalist Katrine Sele for artikkelen ”Å leve med ein som vil døy” i avisa Firda.
På same tid vil juryen nytte høvet til å gje heiderleg omtale til Katrine Sele for sine uredde kommentarar i same avis, der ho stiller spørsmål ved dei etablerte haldningane i kulturlivet i Sogn og Fjordane. Ein kommentator må tore å hevde synspunkt som kan engasjere og skape debatt. Sele er i ferd med å bli ei stemme det er verd å lytte til også på dette feltet.
Førde, 29. september 2005
Arild Nybø Solveig Barstad Arill Riise
(sign.) (sign.) (sign.)
Juryleiar
Sjå også:
NRK Sogn og Fjordane skriv om prisane:
http://www.nrk.no/nyheter/distrikt/nrk_sogn_og_fjordane/5106727.html
Firda skriv om prisane:
http://www.firda.no/nyhende/lokalenyhende/article1766744.ece
