I fjor stakk Trude Bakke av med prisen for si dekning av tankeksplosjonen i Sløvåg. Kven meiner du fortjener presseprisen i år? Bent Are Iversen vann fotoprisen for sitt bilete frå countryfestivalen på Breim, kven har tatt det beste biletet sidan hausten 2008?
Seminar i Sogndal
Tradisjonen tru blir det også i år delt ut pressepris og fotopris. Dette blir gjort under haustseminaret til journalistlaget
i oktober. I år blir truleg Sogndal arena for seminaret, og styret er godt i gong med å planleggje samlinga.
Send inn forslag til kandidatar til presseprisen og fotoprisen til: astrid.solheim@firda.no.
Sommarhelsing frå Astrid Iren Solheim, sekretær/kasserer i Sogn og Fjordane journalistlag
Vedtektene til presseprisen
"Presseprisen i SFJ skal delast ut til ein eller fleire journalistar/fotografar som har bidrege med god journalistikk. Prisen skal delast ut på grunnlag av innsendt materiale, eller ut frå juryen sine eigne observasjonar. Ein jury oppnemnt av styret i SFJ, får fullmakt til å peike ut årets presseprisvinnarar. Alle kan sende inn kandidatar på både interne og eksterne kandidatar. Redaksjonsklubbane har eit særskilt ansvar. Samtlege kandidatar skal grunngjevast, og udokumenterte forslag kan verte forkasta av juryen. Materiale som klubbane meiner styrkjer kandidatane sine sjanser til å få prisen, kan leggjast ved. Dette kan vere artiklar, foto, radio/fjernsynsprogram og anna dokumentasjon på grundig og godt journalistisk arbeid. Dokumentasjon skal helst leggjast ved digitalt i pdf-format eller på e-post. Alt fysisk grunngjevingsmateriale(aviser, CD/DVD-opptak) må kome i tre eksemplar. Prisen skal delast ut på SFJ sitt årsmøte og har ein verdi på 5000 kroner"
A) Prisen gjeld for journalistar og fotografar som er medlem av SFJ.
B) Det vert delt ut ein (1) pris.
C) Kvar kandidat skal plukke ut 1. stk bilete, publisert i løpet av siste kalenderår. Biletet skal sendast inn digitalt.
D) SFJ sin fotopris skal ha namnet: SFJ sin fotopris
E) Biletet skal:
* Ha bodskap, og stå som eit sjølvstendig journalistisk produkt.
* Ha vore publisert.
* Ikkje vere manipulert utover vanleg bildebehandling.
F) Kopi av avissida/eller avisa der biletet stod på trykk, evt. utskrift frå nettavis, kan leggast ved i tre eksemplar for å styrkje kandidaten. Det skal også gje ei grunngjeving for biletet.
G) Tre personar skal sitje i juryen. Minst ein i juryen skal ha fotofagleg bakgrunn. Juryen skal oppnemnast av styret i SFJ. Grunngjevinga av vinnarbiletet skal vere skriftleg.
H) Finn juryen ingen verdige vinnarar mellom dei innsendte kandidatane,
kan dei avstå frå kåring eller på eige grunnlag kåre ein vinnar blant medlemmane i SFJ.
I) Dersom juryen har kåra ein vinnar, skal prisen delast ut under årsmøtemiddagen.
