Det er blitt kjent at det er bråte ut tuberkulose på Sandane, men kommunelegen vil ikkje gi opp ovanfor NRK Sogn og Fjordane kor vidt smitten har spreidd seg. Han seier dette er på grunn av personvern, men ut over det vil han ikkje grunngje hemmeleghaldet.

Redaksjonssjef i NRK Sogn og Fjordane, Kai Aage Pedersen, skriv i eit brev til Gloppen kommune at kommunelegen ikkje tek informasjonsplikta si på alvor.

- Han legg lokk på viktige opplysningar som har interesse for lokalsamfunnet. Me kan heller ikkje sjå at eit slikt vedtak kan grunngjevast med teieplikta. Det er ikkje enkeltpersonar som blir råka av eventuell omtale, og det er heller ikkje grunn til å tru at det kan komme fram opplysningar som kjem inn under teieplikta, skriv Pedersen i brevet som har adresse til rådmann Martin Lyngstad og ordførar Anders Ryssdal.

Hovudspørsmåla NRK Sogn og Fjordane ville ha svar på var kor omfattande tuberkulosesmitten er på Sandane, og i kor stor grad helsepersonell og lokalbefolkning er råka av smitten.

- I ei tid der hissige virus står fram som eit trugsmål for folkehelsa i globalt perspektiv, er det etter vårt syn oppsiktsvekkjande at den ansvarlege for kommunehelsetenesta dreg ned rullegardina og stengjer for informasjon på denne måten. Me håpar og trur at kommuneleiinga vil gripe fat i saka, og gjere det klart kva samfunnsansvar som følgjer med slike stillingar - ikkje minst når det gjeld informasjon. Innbyggjarane i kommunen fortenar presis og god informasjon om tuberkulose, og innsyn i korleis kommunehelsetenesta handterar ein slik situasjon, skriv redaksjonssjefen vidare.