Stor streikeinteresse i Florø

Av

(01.06.06) - Eg trur det må vera nærare 80 % som har stoppa og lytta interessert til det me har å fortelje, seier Geirmund Henjum. Men NRK-journalistane har også fått kjeft.



Henjum er på streiketurne i Florø saman med Camilla Tjønn Thingvoll og Synnøve Aasland.
- Folk har bite seg merke i at det er så stor forskjell på oss og andre. Spesielt er dei overraska over kor dårleg me kjem ut samanlikna med TV2. Eg trur det den viktigaste grunnen til at eit solid fleirtal av dei me har snakka med her i Florø har vist forståing for streiken, seier Henjum.


STREIKEPRAT: NRK-journalistane Geirmund Henjum (t.h.) og Camilla Tjønn Thingvoll i hyggeleg samtale med ei dame i Florø.


Fleire stader
Trioen frå NRK Sogn og Fjordane har tilbrakt føremiddagstimane fleire stader i kystbyen.
- Me starta utanfor Amfi-senteret, før me spaserte gjennom Strandgata. No er me på Kakebua, for å prata med folk her. Me reknar med å vera her minst ein time til, fortel Henjum i 11.30-tida.

Henjum rapporterer om god stemning, og nyttar høvet til å skryta litt av Florø-folket.
- Det har vore veldig artig å vera her. Florø-folk er jo oppegåande folk. Dei fleste er både interesserte og støttande.


Men også kjeft
Men så var det han som kjefta då.
- Eg ville gi han eit flygeblad. Han såg meg rett inn i augene og sa at denne streiken gav han ærleg talt blankt faen i. Då var det jo ikkje meir å sei om den saka, seier Henjum.

Sjå Firdaposten si sak om streiketurneen i Florø: http://www.firdaposten.no/lokale_nyheiter/article2128781.ece

STREIKEMØTE: Dei streikande NRK-journalistane møtte også på andre i streik i Florø. Finansforbundet vart tekne ut i streik tidlegare i dag, og dermed har mellom anna dei tilsette i Gjensidige trekt ut i gatene i dag. F.v.: Synnøve Aasland, Kjell Valvik, Camilla Tjønn Thingvoll og Nils Vegar Kvam.





Idium webpubliseringWEBPUBLISERING