Medan sponsorfiffen skålar i champagne utanfor Bislett stadion, samlar kring 150 streikande NRK-arar seg utanfor VIP-inngangen. NRK-journalistane lurer på om dei skal prøve å overdøve cocktail-vokalisten på VIP-området, men etter kvart vert dei like godt invitert inn i varmen.

- NRK har skapt store problem for Bislettalliansen, så for å gjere bot kjem dei og syng for oss, seier Steinar Hoen til sponsorane på VIP-området.

- Dei er i ei lovleg konflikt, seier Hoen, som sjølv har jobba for NRK.

Kult

Etter ein kort introduksjon frå Hoen framfører koret på kring 150 NRK-medarbeidarar eit spesialkomponert streikestev.

- Utruleg kult tatt av han, seier Ingerid Stenvold frå NRK Sporten, som leiar streikegjengen utanfor Bislett stadion.

- Eg syns vi traff tonen relativt bra, eg, seier Marion Solheim i Dagsnytt-klubben etter framføringa.

– Veldig bra at vi fekk syngje for sponsorane. Generøst av fiffen. For min del sakna eg ropert og banner, men innsatsen er det ingenting å seie på, legg ho til.

- Området var fullt av VIP-gjestar og sponsorar, som er dei som er mest skadelidande av streiken. Det var veldig sporty at vi fekk syngje, seier Ingerid Stenvold, før ho traver avgarde til andre sida av Bislett stadion.

Brøl

Ikkje mange minutt seinare stiller NRK-koret seg opp ved hovudinngangen, for fjerde gong denne kvelden.

- Ein siste gong no, seier Ingerid Stenvold, og får koret til å lage sitt eige NRK-brøl.

Stevet de streikende sang:

Oppe på Marienlyst der jobbe ein gjæng
Hei for jussebassi, jussebassi jom
Som jobbe og slit, men som ikkje får pæng
Hei for jussebassi, jussebassi jom
Finaste journalistan - OPP ME HAINNA!
Johnny Bernander - no e vi forbainna
Hei for jussebassi jom
Snart e lommeboka tom
Hei for jussebassi, jussebassi jom 
 
Av Kjetil Malkenes Hovland